البِنَيّات البِمُرْقَن مِن مَسَامَك
كُلَّ ما غنّيت عشية إمتحان
زي وجع صحي
وكأنك لما تتحتحت معاهِن
بركبك فرس الرهان
البنيات الرهافة السر
وما يأتي نهار الدهشة
بتمصمص مخاوفك ضلفتين في البحر
وخُشَّن يا بنات الخربشة الطاعمة
عليكن قدرة الموج والفضا الغبيان
مُورّط غيم وتسبيح في الجنون
يَهَرِد حشَا الدهشة
ويسافر في النُعاس حفيان
إلا من الرهافة
فما تيسر من وجع بَسْتَحْمَلَك
يا مُوت طَرِي
ويا مُوج لو بتعرف طُول حبالك
كُنتَ كَتَّفْتَ البحر مِن جِنُّو
والبِنيات البيمرقن من مسامك
كل ما غنيت عشية امتحان
كأني أنا الوحيد
الخُنْتَ إحساس الوطن باللحظة
إنشريت عصور
ما قَبل جَيْة الخلق
أتنبّرمسام الريح
واحكي عن المكان
في بت تخربش ضَحْكَتَها السُلطة
كأني أنا الوحيد
التُّهتَ في الهُدى
والصِراط عاري
مَكَتَّف بالسلف والورطة
يا موسى
ما شَجَّ البَحَر غير ديل
عصافير القيامة الفينا
لابسات الدعاش والهم فساتين
مسلمات حَدّ الفضيحة
ولا يزال فَرَس الرهان إبليس
سليمان لما اتورط سبأ
بلقيس نِسَت توبها وتَدَلَّت مسرحين تاريخ
وجيناك يا بحر نِتْعَمّدَك
مَرَقَت مخاليقك
طشّيَت
جَرَحْتَنَا بِالدّوَار
وكنت بِتْتَطيِّب كَسِيِحَك
وما إِلَاكَ من داء مفاصل
وحُمّى عميانة ورَمَد
فجأة اكتشفناك
سرّنا الغايب محمد بن عبدالله
تَوَخِّيَنا الحذر
فاتدلى مننا موج على الصَحَرا وضِهِب
قامت قيامة الناس هناك
واستهبل التاريخ شبابيكنا
وفَتَحنَا على الرياح تاني ومشى
لسة بتوترنا بحديثك يا نبي!!؟
لسة بتحملنا الأمانة!!
وانت عارف عبء هذا الشارع الفينا
وجروح الياسمين..!!!
البنيات والرهافة الممكنة
وكاس من حزن ناعس
أنا داقس
أنا شاهد مقاصلك
والصفيح ضُل الحفا الهبشوكا جواهم
نَهَرْتَ رهافتهم بالوِيَل
ما كان دة احساس بالفدا
ما كان دة حلمك يا خليل
كل الخلوق الليلة كَبْش
والفالح يرجع آدم التفاحة
وأحلام الجليل
من وين نجيك يا الله..!!؟
مليانين شرافة
وبالبنيات البمرقن من مسامك
كل ما غنيت عشية امتحان
يالله
ما وقفت سماك من غيرنا
مالك ما بتجينا.؟؟!
ونحنا حباتِ اليقين
والسبحة
والدهشة بتَمُوص خاطر الشايلنو عنك
يا الله البنات فكرة..!!؟
وسَهَرْنَا عليك
بيفتش فينا أنثى
من الوجع بكرة..؟؟!!
مين يسوق القمرة
لى حفل الضلام؟؟!
نقريش كلام
أو هسّة في لحظة غَبَاش تريان
لو يقدر يجي الزول من هنااااك
أو بكرة
لو نطفي الشمس في ذوقها
ما نضّفّنا غِيَر الشُوف
عشان نسهر بدون الإلفة
والليل والسلام الإنتقالي
وفي سَفَر عادي
ومُشَقّق بالحنين والحَرْدَة
من أقصى السَهَر
أقصد سَكَر
صحي بنسأل عليك يا مافي..!!؟
كانت وَرِيقَانَك سِهَت في الرّيح
رَمَت عُقَل المَدَاين بالبَلَل
شَتَر المدى الأطفال وعدّمني اللَبَاس
عُريان ووَارِم من خِلاف
في فوضى مُطلقة
مُنتبه عفواً
ومِن عُذراً أليف
طبّقت حيشان البلاد في خُفْ
وضَلّيَت السبيل
سهران
مُربّيِني السُكات بالثرثرة
مَهَبُوش رَفَسْتَ قفاي أَسَف
وفيني لِسّة من المَجَابِيد المُلِحَّة
ومِن خَرِيرَ الأمنيات
مزنوق
ويا الله احتملني عشان أجيك
من مافي
أو من خافي
أو من تِكَّتَك مَسْتُور
كَدحَاً ودَرْءاً
مُستَنِد على فِكرَتَك في الشَّلْهَتَة
وفي أي باب
عَلَّقّتَ أبواب للبنات مِن طِينك الأخضر
أحِب دِينك إذا فَرَقت سَطُر
أو حتى صفحة من البَيَاض
بيناتنا مافي حساب
انحنا عَلَّمْنا الصبر يستنّى أدنى الإحتمالات في الكِدة
يِمْكِن تجي الريح من كدة
أو من كدة
أو من كدة
أو من كدة
أو ما تجي
بس برضو يا صبر الصبر
أصبر وصابر وثابر
وأتقي شرك
عَوِينَك دَقَّسَنَّك بالقلق والسَّكْلَبَة
ومَحَرِيَبَك اتْحَرَّق بِى رِيحة الصيف
وشِيحَك ضرضرنو جهاتك العليا
وسهواً انحنا شاهدنا البحر في الصحرا
خففنا اتساع الرؤيا
عشان نطفش شوية شوية
في بنقو أو في سَكْرَة
أو حتى صلوات بلا وضو
أو حَبَّة مِن الحبيبة المُرَّة
وكانت غايتو أيام مُخْجِلَة
وُكانت لحظة من دهراً عِصِيَر
في ضَلْمَة أكبر مِن تَلَاوِينَك
كَشَحْنَا اللوحة بِالمُوية
وقَعَدْنَا هِناااااك
وانت مِنو الهَبَشَك
وما ضَرَّاك ..!؟
مِنو الحَرَسَك تِجِي تَنَقِّر قَفَاك
في قَلبِ مفتوح بِالبَلاش
لألف مُعجِزَة أو خُرَافَة
وما وَرَاك غِيَر تَلْحَق فِي صَفْ
مُرَجْرَج بالعَرَق.
آسِف إذا خَتِّيَت عنوانيك طَلَق
آسِف إذا ما قِدِرْتَ أقَدِّمَك للأغنية الوطنية
والكلمات فضيحة الله ال كدا
عَجِلٌ وفي قدميَّ رَملٌ شاسِعٌ
أَجِلٌ وفي كَفِّي نَمْلٌ للهوى
للعشقِ
للصلواتِ
للموتِ المؤسسِ
والتَّجَسُّسِ
والقتالِ الباردِ الدَّمَوَيِّ
غِيابَاً عَنْ فَضَافِيضِ الجَسَد.
No comments:
Post a Comment